سياسة الخصوصية

قيد مراجعة محامي. النسخة النهائية تنزل قبل ما يفتح لبس.

‏LBS سوق تبيع فيه المتاجر الصغيرة الفساتين وتشتري منه المتسوقات. هالصفحة تقول شنو نحفظ عنج، ليش، ومن يشوفه.

شنو نحفظ

حسابج: إيميلج، اسمج، ووقت انضمامج.
المتجر (للبائعات فقط): اسم المتجر، اسم المستخدم، المنطقة، نبذة قصيرة، اللون وأقسام الفساتين.
تحقق المتجر (للبائعات بس): رقم التلفون، ورقم الرخصة التجارية وصورتها، ورقم حسابج البنكي (IBAN). صورة الهوية والسيلفي تروح لشركة التحقق Didit، مو لـ LBS، وإحنا نحفظ بس إذا التحقق نجح أو لا.
الفساتين (للبائعات فقط): الاسم، السعر، التفاصيل، وإلى 4 صور لكل فستان.
الطلبات: شنو انطلب ومن أي متجر، المبالغ (الفستان، التوصيل، رسوم الخدمة)، خطوات الطلب (تم الطلب، تم القبول، في الطريق، تم التوصيل، ملغي) وحالة الدفع.
المحادثات: الرسائل بين المشترية والمتجر.
تاريخ الميلاد والجنس (اختياري): بس إذا قررتي تضيفينها.
صور الطلبات والمشاكل: صور التوصيل والصور اللي تنرسل مع بلاغ مشكلة.
محادثة المساعدة: اللي تكتبينه في فقاعة المساعدة في LBS، والردود.
الهواتف المسجّلة: قائمة بالهواتف المسجّل دخولها على حسابج، مع عنوان الإنترنت (IP) اللي استخدمه كل هاتف، عشان تقدرين تطلّعين هاتف.
تقارير الأعطال: إذا تعطل التطبيق، ينرسل تقرير لشركة تقارير الأعطال Sentry. ما فيه اسم ولا إيميل ولا رقم هاتف.
التقييمات: النجوم والكلام اللي تكتبه المشترية عن المتجر بعد طلب واصل.
المدفوعات: المبلغ، الوقت، وهل اندفع أو فشل أو للحين ينتظر.

شنو ما نحفظ

بيانات بطاقتج. تدفعين في صفحة شركة الدفع. رقم بطاقتج ما يمر على LBS وما نشوفه أبد.

ليش نحفظه

عشان نسوي حسابج ونسجّل دخولج.
عشان نعرض المتاجر والفساتين ونستقبل الطلبات ونخليج تسولفين عنها.
عشان ناخذ الدفع ونوريج كل الرسوم قبل لا تدفعين.
عشان نحافظ على أمان السوق ونصلح المشاكل.

ما نبيع معلوماتج لأحد.

من يشوفه

الكل يشوف صفحة المتجر المعتمد وفساتينه وصوره وتقييماته.
المتجر يشوف الطلبات اللي جته، واسم المشترية، والمحادثة معاها. التطبيق ما يطلب من المشترية عنوان ولا رقم هاتف. المتاجر تعطينا رقم موبايل (شوفي "شنو نحفظ"). وإذا كتبتي عنوانج في المحادثة، المتجر يشوفه، فاكتبينه بس إذا تبينه يوصل المتجر.
المشترية تشوف طلباتها ومدفوعاتها ومحادثاتها بس.
باقي المستخدمين ما يقدرون يقرون طلباتج أو مدفوعاتج أو محادثاتج.
شركة الدفع تتولى دفعج في صفحتها، وفق خصوصيتها.
فريق LBS يقدر يشوف البيانات عند الحاجة لتشغيل التطبيق ومساعدتج.

الشركات اللي نستخدمها

هالشركات تساعدنا نشغّل LBS. كل وحدة تاخذ بس اللي تحتاجه لشغلها.

‏Supabase: تخزّن البيانات.
‏Sentry: تستقبل تقارير الأعطال.
‏Didit: تتحقق من هوية صاحبة المتجر.
‏UPayments، شركة الدفع: تاخذ الدفع بالبطاقة.
‏Expo وApple وGoogle: توصّل التنبيهات لهاتفج.

صور الفساتين

صور الفساتين عامة. أي أحد عنده الرابط يشوفها. بس المتجر صاحب الفستان يقدر يضيف الصور أو يبدلها أو يحذفها. الصور JPEG أو PNG أو WebP أو HEIC، وكل وحدة إلى 5 ميغا.

المحادثات

كل مشترية ومتجر بينهم محادثة وحدة، حتى لو صار أكثر من طلب. أي طرف يقدر يمسح المحادثة من عنده. المسح يخفي الرسائل القديمة عنج إنتي بس. الطرف الثاني للحين يشوفها.

الاحتفاظ والحذف

تقدرين تحذفين حسابج من التطبيق: الإعدادات ← الخصوصية ← احذفي حسابي. ينحذف بعد 14 يوم، فتقدرين تغيّرين رأيج. لازم الطلبات المفتوحة والفلوس المحجوزة تخلص أول.

لما ينحذف حساب:

ينمسح: ملفج، متجرج، فساتينج وصورها، رسايلج وتقييماتج.
يبقى بدون اسم: الطلبات والمدفوعات السابقة اللي اندفعت تبقى عشان الطرف الثاني يحتفظ بسجلاته. واسمج ينشال عنها.
المتجر المحذوف: إذا كان للمتجر طلبات سابقة، المشتريات تشوفها من "حساب محذوف".
البلاغات: إذا بلغتي عن أحد، أو أحد بلّغ عنج، نحتفظ بنسخة من الكلام المبلَّغ عنه عشان نتأكد منه.

ما عندج التطبيق؟ اكتبي لنا على support@lbs-kw.com من الإيميل اللي سجلتي فيه، وراح نحذف حسابج.

الحذف نهائي. نحتفظ بسجلات الطلبات 5 سنوات، وبعدها نحذفها.

اختياراتج

تقدرين تغيرين اسمج أو بيانات متجرج من التطبيق. وتقدرين تطلبين منا نوريج أو نصحح أو نحذف اللي نحفظه عنج.

الأطفال

‏LBS لمن عمرهم 21 سنة أو أكثر.

التغييرات

إذا غيرنا هالصفحة، راح نحدّث التاريخ فوق.

التواصل

‏support@lbs-kw.com